Tresna Mayang Uyak Kumbang

Sawetara dauh pitu semeng mamunyi telponne di kamar tamu. Krrriiiiinggg…. Krrriiiiinggg….. krrriiiiinngg…… ngenggalang Tu Laksmi malaib uling kamarne pesu lakar nganggkat telpone. “Om Swastyastu. Tiang Laksmi, niki sira nggih?” keto Tu Laksmi ngomong di telpone munyine sada jangih nylengking.

“Om Swastyastu. Tiang Panji, Tu. Putu wenten kesibukan mangkin nggih?” keto Panji matakon teken Tu Laksmi. Masaur malih Tu Laksmi, “Ooh Bli Panji. Ten ja sibuk tiang mangkin Bli. Anak wenten napi nggih? Adi Bli matakon keto?”

“Kaden Bli, Putu sibuk jani. Bli lakar ngajak Putu  luas malali nyanan ka pasih Sanur. Dinane mani Bli libur di kantor. Maan waktu Bli ngajak Putu luas malali dinane jani. Ajaka maliang-liang ditu anggon nylimurang manah. Enken Tu, nyak ae?” Panji nyucudang matakon teken Tu Laksmi, tunangane ane paling sayanganga ento.

Tu Laksmi tusing nyautin patakone Panji, ia makeneh-keneh malu. Yen luas ngajak Panji sinah memene lakar nguelang,nanging bas kaliwat sayangne Tu Laksmi teken Panji pamuputne ia nyak ajaka luas malali teken Panji. “Nggih Bli, rereh manten tiang mulih. Sawetare jam papat sanjane. Tiang nyak luas malali. Nanging jam pitu petenge tiang apang suba jumah. Punapi Bli, misadia nggih?”

“Nggih Tu, eda Putu sumandang saya teken Bli. Jam pitu pasti Putu suba ajak Bli mulih. Antosang Bli jumah, nyanan Bli ngalih Putu kemu.” Suba suud ngraos amonto laut matianga telpone.  Lega pesan kenehne Panji lakar maan ngajak tunangane sayang luas malali. Suba makelo Panji tusing taen ngajak Tu Laksmi luas malali, ulian sibukne maka kalih.

Tu Laksmi lan Panji matunangan ada suba duang tiban. Diastun suba makelo matunangan memene Tu Laksmi tileh tusing setuju yening pianakne matunangan ngajak Panji. Yan enken kaden undukne gedeg pesan memene Tu Laksmi teken Panji. Tusing ada nawang apa keranane, sabilang Panji mulih ngalih Tu Laksmi sinah memene ngembras ngambul tur nguelin Panji. Nanging ulian sayangne Tu Laksmi teken Panji lan Bapane masih suba setuju Tu Laksmi tetep matunangan ngajak Panji.

Panji magae di Dinas Pendidikan Kota Denpasar, suba ada sawetara telung tiban Panji magae ditu. Panji anak seleg magae, tusing pelih yen Tu Laksmi nyak metunangan ngajak Panji. Suba ngelah pagaean ane tetep, ngelah umah padidi, goba bagus tur demen nulungin timpal. Panji mula dadi muani idaman ditu di kantorne, diapin suba tawanga ngelah tunangan enu dogen ada anak luh ane ngepugin.

Keto masih Tu Laksmi suba magae dadi perawat di RS Sanglah. Sawetare ada duang tiban tengah ditu ia magae. Patemone ngajak Panji sing ada len kerana Panji karawat ditu di RS Sanglah sedek ia gelem Demam Berdarah. Benih tresnane lekad ditu, suba pada kenal laut Panji nyambatang tresna lan katrima olih Tu Laksmi. Tu Laksmi bajang jegeg dadi idaman truna-truna di desane. Nanging amongken ja anak muani nguberin kenehne pageh tuah ajak Panji dogenan.

“Om Swastyastu.” Keto ada anak ngraos diwangan umahne Tu Laksmi. Ngenggalang Tu Laksmi pesu ngampakin jelanan. Mara neked diwangan suba egar kenehne Tu Laksmi ane teka sing ja ada len tunangane sayang. “Negak malu Bli, ne I Bapa ada lakar raosanga ngajak Bli.” Ditu Tu Laksmi ngorahin tunangane negak ngajak Bapane. Negak laut Panji ajak Bapane Tu Laksmi. Tu Laksmi ngencolang ka paon ngaenang teh.

“Panji, Bapa ada lakar omongang abedik. Wireh Panji lan Putu suba makelo adane matimpal. Men enken sujati keneh Panjine teken Putu? Apang bisa masih Bapa maitungan ngajak Memene Putu. Apang sing Panji sabilang mai kapragat ambulina.” Keto Bapane Tu Laksmi nyumunin ngraos nakonang kasujatian keneh Panjine teken pianakne.

Bengong Panji mirengang raos Bapane Laksmi. Yen suba lung kene panampine sinah suba lakar setuju reramane Laksmi keto di kenehne Panji. “Puniki Pa, tiang anak mula sujati demen teken pianak Bapa. Keto masih Putu teken tiang anak mula sujati tresna. Sampunang Bapa sumandangsaya teken raos tiange puniki. Yening unduk I Meme tiang ten taen sanget. Suba tawang tiang abahne mula kenten. Nanging tiang mapangidih teken Bapa olasin kuda Meme apang sida nerima dewek tiange.” Panji madiolas teken Bapane Laksmi apang sida Memene Laksmi nerima dewekne dadi tunangan pianakne. Buina ia marasa tusing taen ngae pelih teken reramane Laksmi.

Disubane mara amonto ngraos padaduanan saget teka Tu Laksmi ngaba the kasarengin baan Memene. Negak sadu arep punika sareng papat. Tusing ada bani makeengan, tuah bengong lan pada nguntul. “Kene nyen Panji, Bapa lan Meme tusing ja tungkas ajak Panji yening mula saja tresna teken Laksmi. Meme anak tusing nyak yen Laksmi enggal nganten ento makrana Meme setata nyebeng lan ambul-ambul sabilang Panji mai ngalih Putu.” Mara keto raos Bapane Laksmi lega pesan kenehne Panji. Minab suba titah Hyang Widhi, Panji lan Laksmi lakar majangkepan.

“Punika Pa lan Meme, tiang sujati tresna tekening Laksmi nanging tusing ja kadi penampen Memene lakar enggal ajak tiang Laksmi nganten. Tiang masih enu cerik konden pantes rasane yening lakar nganten enggal-enggal. Tiang kari ngrereh gae ane melahan apang ada bekel mani puan pet prade sujati tiang majodoh ajak Putu apang ada bekel.” Alus banban Panji ngraos ajak reramane Laksmi. Apang sida katerima lan percaya kasujatian kenehne Panji teken Laksmi.

“Nah lamun keto kasujatiane Bapa ajak Meme tusing ja tungkas, melah-melahang nyen matimpal apang sida setata adung.” Keto reramane Laksmi mabesen teken kakalihne. Egar manah kakalihne ane jani reramane suba pada satuju. Ditu lantas kakalihne mapamit lakar luas malali ka pasih Sanur.

Ane jani suba ada telung tiban majalan kakalihne matunangan. Yen uling dija kaden teka bayane ditu Laksmi kena sengkala. Satekane uling magae di RS Sanglah tumben ia majalan padidi sawireh Panji tusing nyidaang ngalih, gegaene kari akeh. Suba peteng majalan padidi, apa buin anak luh jegeg kadi Laksmi sinah liu trunane ngugul di jalan. Ditu Laksmi ka parikosa olih truna-truna ane sedek minum-minum. Laksmi tusing nyidayang ngalawan sawireh ada ajaka lima ane ngisiang dewekne.

Laksmi majalan mulih, ngelin sigsigan lan tusing bani ngraos apa neked jumahne. Memene ane nolih pianakne ngeling ngencolang ngalih Laksmi ka kamarne. “Cening, adi cening ngeling? Ada apa adi cening buka kene? Orahang teken Meme, Ning.” Memene nakonin sada adeng apang Laksmi nyak ngorahang kasujatiane ngudiang ia ngeling sigsigan buka keto.

“Me, ampurayang tiang Me. Tiang ten bisa ngaba raga. Ne dewek tiange suba tusing sukla buin Me.” Mara amonto raosne Laksmi nyangetang ngeling lan Memene masih bareng ngeling mireng raos pianakne.

“Nyen ane ngae cening buka kene, Ning? Tegarang sambatang teken Meme. Apang sida Meme lan Bapa ngalihang pajalan ane lung, enken ja sapatutne. Eda cening sebet Meme lan Bapa tusing ja lakar nguelin. Orahang malu nyen anake ento, Ning?” buin memene nyekenang matakon teken Laksmi, nyen benehne ane nyengkalen pianakne.

“Tiang ten nawang, Me. Dugas tiang majalan mulih, rame anak truna minum-minum di jalane. Ditu tiang kagisiang, kasengkalen. Tiang tusing nawang Me. Tiang tusing nawang….” Makesiab Memene Laksmi, mara amonto raos pianakne. Nadak uyang paling keneh Memene. Kudiang jani ban madaya yening suba kakene.

Uling sukat ento Laksmi tusing taen nyak pesu uling kamarne. Peteng lemah setata ngeling mapangenan. Suba magenep reramane madaya apang Laksmi enyak pesu masih tusing nyidayang. Ngantos Panji teka mulihne Laksmi malali. Ditu Panji orahinaundukne Laksmi buka keto. Sebet kenehne Panji mirengang unduk buka keto. Tunangane sayang jani kena sengkala, kadi rasa nyag tangkahne Panji.

Panji majalan ka kamarne Laksmi, ngalih Laksmi apang nyak pesu, apang tusing setata mapangenan. “Tu… Tu Laksmi ne Bli Panji teka mai Tu. Mai pesu Tu, Bli kangen teken Putu. Ngudiang Putu tusing nyak pesu?” mireng munyine Panji, Tu Laksmi nyangetang ngeling, lek kenehne yening Panji nawang unduk dewekne kasengkalen buka keto. Sebet kenehne sinah Panji lakar ngalahin dewekne ngalih anak luh elenan.    

“Mai pesu Tu. Putu tusing kangen teken Bli ae? Ngudiang Putu tusing nyak pesu? Apa pelih Bline teken Putu?” Panji sada sebet ngomong buka keto. Yening ingetange tutur reramane Laksmi itunyan, misi jejeh masih kenehne Panji tusing ke Laksmi kenapa napa di kamarne. Suba makelo Laksmi tusing nyautin patakone. Ditu laut ia nobrak pintune. Dapetange Laksmi suba magetih-getih. Kadi samber tatit awakne Panji. Makesiab, inguh paling nolih tunangane suba kaketo. Ditu ia ngaukin reramane Laksmi. “Meme….. Bapa…. Enggalang meriki!” makraik Panji ngaukin reramane Laksmi.

“Bli…. Dija tiang niki? Adi rame kene anake?” keto patakone Laksmi teken Panji. Mara ilangan sebet kenehne Panji, Tu Laksmi suba sadar. “Putu di rumah sakit ne Tu. Eda buin Putu sebet, Bli suba dini nimpalin Putu. Bli tusing lakar ngalahin Putu. Bli sayang sujati sayang teken Putu.” Geluta Laksmi teken Panji. Kadi rasa tusing kalebang, ulian sanget sayangne teken Laksmi.

“Bli, sinah Bli suba nawang enken paukudan tiange jani. Napi Bli nyidayang nerima tiang malih?” Tu Laksmi matakon sambilanga ngeling. Ngetel yeh paninggalane di pipine. “Tu, diapin Bli suba nawang enken paundukane, Bli tusing lakar ngalahin Putu. Suba nasib iraga buka kene. Eda Putu sebet, dini Bli setata satia teken Putu.” Masriak galang kenehne Tu Laksmi mireng raos tunangane ento. Keto sayangne Panji teken Laksmi. Mula sujati sayang yadiastun tresnane suba mayang uyak kumbang. Makakilihne magelut, pada ngerasayang kasujatian tresnane. Keto masih reramane pada egar manahne nyingakin pianakne pada adung lan saling satia. 

Luh Wayan Lilis Primayanti 

Ulian Punyah

Sang Hyang Surya sampun metangi, makenyem manis nglimurang ati. Damuh sane ring punyan-punyanane sampun pada masreok tuun. Kedise manguci saling sautin, ngaenang liang kenehe rikala semenge puniki. “Kukuruyuk…… Kukuruyuk…..” munyin siape mangunang I Bapa Ketut.

“Duh…. Dewa Ratu! Saget suba tengai. Matane mara kedat, undap-undap sada uyun-uyun buin. Kalahanga teken siape, uling semeng suba nyalanang swadharmane. I dewek kali jani mara bangun.” Keto I Bapa Ketut ngrimik di pasarean padidina. Tumben ngerasaang bangun tengai. Ento tusing ja ada len tuah kerana sangkepan di banjar dugas dibi sanja. Nganti kalemeng sangkep ngraosang indik pipis LPD lan Bapa Ketut kasuudang dadi Ketua LPD di Desa Sekar Arum.

“Bli…. Bli Ketut nang enggalang ja bangun! Sing tolih ne suba jam kuda?” keto Men Sari teka ngojog kakamarne. Dapetanga kurenane mara kedat, laut nglantas nyroscos ngomong cara ceng-ceng. “Bli, suba tengai ne, Bli! Ngudiang Bli mara kedat? Tolih to suryane suba baduur! Ubuh-ubuhan suba nagih ngamah, di natahe konden masih nyampat. Ne jani tiang lakar nyakan di paon.” Suba suud ngomong keto Men Sari pesu uling kamarne.

Bapa Ketut pesu uling kamarne, srandang srendeng pajalane, laut ngomong “Memene, gaenang ja Bli kopi malu. Buin kesep Bli nyampat di natahe.” Suba lantas keto teka Men Sari ngaba kopi agelas. “Neh Bli kopine.” Keto Men Sari ngomong lan ngemang kurenane kopi agelas. Bapa Ketut nyemakin laut nyiup kopine. Di subane telah, Bapa Ketut nyemak sampat laut nyampat di natahe.

Men Sari iteh nyakan di paon. Men Sari mula anak istri jemet magarapan. Sakancan gagaene jemaka, ento tusing ada len kerana idupne makurenan setata kuangan, nanging diapin setata kuangan Men Sari tetep satia ngayahin kurenane. Apa buin Bapa Ketut anak sakit-sakitan. Tusing bani Men Sari nyangetang unduk Bapa Ketut ane bangun tengai. Suba tawanga dibi sanja di sangkepan Bapa Ketut dadi unteng babaosan kramane.

Ulian lempas laksanan Bapa Ketute dugas dadi Ketua LPD, ngemaang anak nyilih pipis duang dasa juta tusing nganggon jaminan. Yening manut kramane ento tusing dadi, kerana pipise ane siliha liu sajan. “Yening tiang minehin punika ten patut, buina pipise ento liu sajan. Ngudiang dados nyilih ten nganggen jaminan?” keto Nang Sekar ngusul di banjar.

Kasautin buin baan Bapa Lagas, “Beneh buka raosne Nang Sekar. Adi bisa Ketut nyemak keputusan keto? Yen kene unduke suudang suba Ketut dadi Ketua LPD. Tusing pantes rasane jani Ketut dadi Ketua LPD.”

“Nggih, tiang setuju sakadi usulne Bapa Lagas. Yen suba kene apa gunane Ketut dadi Ketua LPD nanging tusing bisa nyalanang swadharma.” Keto Nang Locong ngraos ngorahang setuju teken usul kramane sane tiosan.  

“Krama sareng sami, tiang uning laksanan tiange puniki sampun lempas. Tiang nunas pangampura majeng krama sareng sami. Nanging sujatine utang anake ento sampun lunas ka taur. Napi malih sane dados pikobet?” Bapa Ketut ngraos sada ngabela dewekne.  

“Ketut suba tusing bisa nyalanang swadharma dadi Ketua LPD. Yening Ketut enu dadi ketua tusing ja abesik anake lakar baang nyilih pipis liu, nanging tusing nganggo jaminan. Ae lamun konyang ane nyilih enyak mayah, yen tusing krama banjare ane lakar rugi. Sinah suba sing pantes Ketut dadi Ketua LPD. Suud suba Ketut ngayah di banjar dadi Ketua LPD!  Ten kenten karma sareng sami?” Bapa Lagas nyautin raos Bapa Ketute ibusan nyinahang dewekne tusing satuju yen Bapa Ketut enu dadi ketua LPD.

Kramane ane tiosan tuah bisa ngorahang setuju teken usulne Bapa Lagas. Ditu Bapa Ketut tusing nyidayang ngraos apa-apa buin sinah dewekne suud ngayah dadi Ketua LPD. Minab tuah amonto semayan dewekne ngayah di banjar, ane jani suba tusing kanggoange teken kramane. Sujatine tusing ja konyang kramane melihang Bapa Ketut, yen manut kramane ane tiosan tusing ada pelihne masilihang pipis tusing majaminan, apa buin suba nyidayang ngelunasang mayah. Nanging kramane ane tiosan tusing bani mesuang usul di banjar. 

Minab Widhine sueca tekening Bapa Ketut, disuba makelone ketara kramane ngusul  di banjar ulian mabayah. Ane mayah ento tusing ja len tuah nyama Bapa Ketute ane madan I Bapa Tanjung. I Bapa Tanjung gedeg teken krama banjare kerana dugas pemilihan Kelian Adat di Desa Sekar Arum dewekne tusing ada ane milih. Ane jani LPDne lakar gaena apang uwug. Yening suba maganti ketuane sinah LPDne tusing lakar nyidayang maju. Anak suba tawanga teken Bapa Tanjung di banjar tuah Bapa Ketut ane dueg ngurusang pipis. Yen jani suudanga sinah ane nyilurin tusing ja luwung cara Bapa Ketut.

Bapa Ketut tusing nyangetang unduke ento. Suba tawanga mula Bapa Tanjung demen mamunyah. Punyah teken kedudukan lan kawibawan. Tusing ngitungang laksanane ento corah, ane penting ia maan kedudukan lan idup mewah. Nyama padidi dadiange talenan di banjar.

Bapa Ketut ngomong ajak kurenane “Memene, minab kene suba pajalan idup iraga, eda pesan Memene gedeg teken nyama Bline. Ia anak sedek punyahe ane jani. Tusing ngitungang enu manyama. Ne penting ia maan kedudukan lan ngelah adan di banjar.”

Masaut Men Sari, “Bli, tiang tusing ja gedeg teken nyama Bline. Nanging tiang tusing demen keneange, Bli tusing pelih dadianga talenan di banjar. Yen mula edot dadi Kelian Adat benahin ja malu laksanane, sinah kramane lakar milih ia dadi kelian. Nah… kudiang men Bli suba pajalan idup iraga, ane jani tuah nyidayang nunas ica ring Sang Hyang Widhi mogi ja I Tanjung sadar teken solahne.”

“Nah keto suba Memene, anak suba peduman idup iraga. Karma phala anak tetep majalan, Widhine anak tusing ja sirep. Sinah sampun uningina karma I manusa di jagate.” Keto buin Bapa Ketut negtegang kenehne. Ulian punyah Bapa Tanjung tusing inget teken nyama ane suba sai ajake bareng. Anak pajalan idup adane, tusing ento patut seselang. Jani beten buin mani bisa masih baduur. 

Luh Wayan Lilis Primayanti