puisi bali

Mawayang Gadang

Bayang-bayang ngelintang

Ring sajeroning awang

Ngindang-ngindang mangulayang

Nudut kayun manganyudang

I Wayang Gadang

Ngrangsuk I Kumbang

Nolih sekar sedek kembang

I Kumbang ngindang

Ngalap sekar kaplaibang

Malaib ngadamplang

Tan pari wangde I Sekar makutang

 Ngendah

Aab sampun mawastu wayah

I manusa lali rikala masolah

Kala kali ngrangsuk manah

Sami pada nagih amah

Wong muda lan wayah

Mapi-mapi tan pasalah

Kemu mai tan paarah

Mapayas bungah karasa melah

Tan nolih anak bedak layah

Ne penting ia idup mewah

Ngelah timpal ulian mabayah

Pules peteng stata nglangsah

Karma phala pinaka upah

Pamuput lakar benyah

Purnama

Sunar sunar masunar

Sawat sawat malawat

Sinar suci ning maklening

Sang Hyang Candra masunar galang

Galang galang masawang

Sawang manis manganyudang

Keneh suci mangatonang

Sang Hyang Candra masunar galang

Putih Kuning teja masunar

Sunar suci sujati

Ngawe sutrepti kayun ngulati

Sang Hyang Candra masunar galang

 
Ulian Dolar

Ting.... ting..... ting.....

Maklenting akeping

Glantak glintik mangalinding

Dolar akeping

Pada nguber manguliling

Tunggang tungging

Glalang gliling

Nguber dolar akeping

Ping..... ping.... ping...

Ping kuda kaden matingkah manying

Manying-manying masasimbing

Mara tau awak beling

Inget umah malaib ngadiding

Ngadiding ngadengkling malaib ngeling

Ngalih rerama apang uning

Dewek beling ulian dolar akeping

samayaning ati

Samayaning Ati

Luh Wayan Lilis Primayanti

“Tresna mula sujati tresna tiang kapining dewek Bline, nanging sangkaning pelih Bli kapining dewek tiange, ento ngranayang tiang mapineh buin. Minehin unduk Bline ane dadi ati naduang padewekan tiange. Ingetang semayan Bline ipidan.”

            Keto munyin surat tiange di paletane ane siduri. Nyiriang dewek tiange ane suba kadung pedih nepukin baya ane buka kaketo. Telung tiban suba tiang nyalanang tresna teken I Bli Satya. Nanging pamuputne buka kene ane tepukin tiang. Tresnane kadaduang, sayange suba kalebang, asih lan tulus tresnane kaplaibang. Ngeling sigsigan nyelselin dewek sawai-wai. Petenge karasa sepi, tusing buin ada dering telepon ane ngulgulin sepi lan rindune di ati. Bli Satya suba matilar, suba malaib ngajak anak luh elenan. Yan pinehang, saja buka gendingan pajalan tresnan tiange. Satya ngantosang nanging pamuput tuah kabogbogin.

Saja adane Bli Satya, nanging ento tuah sabatek adan dogen. Solahne tusing pesan nyiriang adane ento. Suba makelo tiang bareng-bareng ngajak Bli Satya nanging enu masi dadi ati nyakitin keneh tiange. Tusing madaya lakar buka kene dadine. Rerama suba pada setuju, buina Bli Satya suba biasa mulih tiange, keto masi tiang suba biasa mulihne Bli Satya.

Nasib tusing dadi kelidin keto masih tusing dadi baan nagihang. Mirib suba semaya tresnane lakar kapegatang tusing buin nyidayang ngelidin. Matuturan teken rerama sinah suba tusing bani, apang tusing bareng sebet ngenehang unduke ane buka kakene. Nanging sakit kenehe tuara baan nyidayang ngengkebang.

Dugas ento tiang suba kelas telu SMA, mara madan nawang tresna teken anak muani. Negak bengong tiang disisin kelase padidian. Teka saget timpal tiange ane satata ajak bareng-bareng nyelimurang keneh. “Tu.... Tu Candra....” keto timpal tiange makaukan, ngesiabin dewek tiange ane sedeng bengong. “Eh... Koming, anak kenken adi kauk-kauk geleh buka keto? Anak kenken lane?” tiang nyucudang matakon ngajak timpal tiange, Koming. “Tusing enken ae, men to Putu bengong ditu padidian. Mai bareng ajak tiang dini, tiang masi lakar ada tuturang bedik.”

“Apa Ming? Eda nake ngae anak penasaran. Lamun tusing penting, tiang tusing enyak kemu. Nyanan Koming nguluk-nguluk tiang buin.” Penasaran teken apa ane lakar Koming orahang nanging takut buin tiang candaina teken Koming. Cara ane suba liwat, demen pesan Koming nguluk-nguluk dewek tiange. Diastun keto tetep tiang enyak majalan ka tongosne Koming negak.

“Tu.. Putu nawang sing Bli Satya? Mahasisya ane sedek praktek di sekolah iragane. Tawang sing Tu?” Koming nakonin tiang unduk Bli Satya, mahasisya ane sedek praktek ngajahin di sekolah tiange. Bli Satya biasa ngajahin di kelas tiange, nanging tusing ja sanget pesan tiang rungu wireh ia tuah mahasisya ane sedek praktek. “Tawang tiang, Ming. Bli Satya ngajahin di kelas masi, ngudiang men tiang tusing nawang. Anak suba sasai tepuk di kelas. Kenken lane? Adi tumben nakonang Bli Satya?”

“Tuni tiang nepuk Bli Satya di kantin, ia nakonang Putu. Nakonang no HP Putune. Baang tiang ja, mara jani tiang ngorahang ajak Putu. Eda pesan Putu nguel nah.” Makesiab tiang ningeh munyine Koming buka keto. Nanging tiang tusing ja nguelin Koming, tusing luung rasane yan ulian keto dogen tiang nguelin timpal padidi.  “Nah, tusing kenken Ming. Tiang tusing gedeg. Men adi Bli Satya nakonang no HP tiange? Anak ada perlu apa lane?” keto buin tiang matakon ajak Koming, wireh tiang tusing dadi perangkat kelas ngudiang men Bli Satya nagih no HP tiange.

Koming tusing bani nyautin patakon tiange ento. Ia siep, nanging tuah makenyem dogen di arep tiange. Tiang tusing ngerti adi Koming tumben buka kaketo. Biasane anak liu pesan munyine yan suba maan nutur ajak tiang. Sakonden ia ngalahin tiang luas, enu masi ia maan ngomong abedik, “Tusing kenken Tu, nyanan yan suba ada SMS sinah Putu lakar nawang kenken sujatine.” Laut ia luas ngalahin tiang ane enu ngelongok bengong buka kebo mabalih gong.

Saja buka munyine Koming, petenge ento Bli Satya SMS tiang. SMSne  biasa dogen cara anak ane mara kenal, makenalan, macanda, ngomong kangin kauh. Enggal pesan rasayang tiang akrab ngajak Bli Satya diastun tuah uling SMS. Petenge ento tusing karuan keneh tiange, lega, demen, tusing bisa baan tiang ngundukang.  Uli sukat ento ngancan akrab tiang ngajak Bli Satya, tusing buin tuah SMS nanging di sekolah masi suba biasa ajak nutur, macanda lan nuturang unduk paplajahan ane tusing karesep baan tiang. Makelo-kelo ngancan raket rasayang tiang, binih tresnane ngancan tumbuh di ati. Tusing ada anak nawang uling dija kaden tekane saget suba mentik di ati.

Dinane ento tumben pesan Bli Satya tusing ngorahang lakar luas kija, biasane satata ngorahang teken tiang. Tiang inguh padidi, suba uling semeng Bli Satya tusing makabar. Antosin tiang nganti sanja. Ada sawetara jam pitu, saget ada motor mareren di aep umahe. Buina ada anak ane kauk-kauk uling diwangan. Mageson tiang pesu ngampakang jelanan. Mara neked diwangan makesiab tiang nepukin Bli Satya suba majujuk di aep tiange, keto masi Koming ngajak Suputra.

“Yeh... Bli. Mai ka tengah, Bli. Keto masi Koming ajak Putra mai ka tengah. Dingin pesan di sisi.” Tiang ngorahin Bli Satya, Koming lan Suputra apang ka tengah umahe, wireh di sisi gesit pesan petenge ento. “ Negak malu Bli, keto masi Koming ajak Putra. Adi tumben malali mai Bli? Koming ajak Putra kapah pesan masi enyak malali, jani tumben rerod-rerod malali.”

“Iseng ja Tu, Bli edot nawang umah Putune. Mare mapas nepuk Koming ajak Putra orahin Bli ngateh mulih Putune. Bli anak lakar ada omongang bedik ajak Putu, ajak reraman Putune masi peda. Reraman Putune ada jumah?” Bli Satya matakon tekening dewek tiange. Makesiab tiang mireng munyine, adi tumben ada anak muani mulih saget suba lakar ngomong ajak rerama, ada apa ene sujatine? Keto tiang makelo mapineh.

“Ada Bli anak sedek mabalih ditu di kamare, jani kaukang tiang men Meme ajak Bapa tiange. Anak ada apa benehne Bli?” inguh atin tiange mara Bli Satya ngomong buka busan, apa ja sujatine ane lakar omonganga. “Meme... Bapa... ene timpal-timpal tiange malali mai. Mai ja Pa.. Me.. bareng-bareng dini.”

Suba lantas teka Meme ajak Bapa tiange ditu makejang pada negak, tiang ngaenang teh lan kopi ka paon. Tusing karuan keneh tiange, takut lakar ada apa-apa yen ngingetang munyine Bli Satya busan. Nanging sukserahang tiang teken Widhine mogi ja tusing ada apa-apa. Laut tiang ngaba teh lan kopine ka tongos rerama lan timpal-timpal tiange negak.

“Bapa... keto masi Meme, tiang niki tuah timpalne Putu, tiang mahasisya praktek di sekolahne Putu. Wastan tiang I Gede Satya. Ampura yening tiang malali peteng-peteng mriki.” Alus pesan Bli Satya ngomong, ngenalang dewekne teken reraman tiange.

“Nah De, tusing kenken. Bapa ajak Meme masi demen yen timpal-timpalne Putu pada enyak malali mai, sawireh Putu satata padidiana. Yen jani suba rame kene sinah Putu lakar demen. Men kenken adi tumben malali, De?” Bapa ajak Meme tiange suba liang atine nolih timpal-timpal tiange enyak malali lan rungu teken tiang.

“Puniki Pa, Me... sujatine tiang mai anak lakar ada orahang ajak Meme lan Bapa keto masi Putu. Uli pidan sukat tiang kenal ajak Putu, ada suba lima bulan liwat. Tiang anak demen pesan teken Putu. Tresna tiange suba mentik di atine.” Suba ngomong amonto Bli Satya nguntul, naanang rasa elek kenehne ngomong buka keto. Tiang masi tusing madaya yen Bli Satya lakar ngorahang demen teken tiang dinane ento.

“De... Bapa tusing ja tungkas teken keneh Gedene. Nanging Gede apang nawang anak Putu lakar ngalih sentana, wireh pianak Bapa tuah Putu dogen. Men kenken De, apa ke Gede lakar nyadia nyentana dini? Apang tusing mani puan disubane Gede ajak Putu pada seken nyalanang tresna pegat di jalan ulian unduke ene.”

“Nggih Pa... yening unduk nika anak suba tiang nawang, Koming dugas niki ngorahin tiang. Tiang suba masi matatimbang ngajak rerama jumah. Konyang suba pada ngemaang tiang nyentana. Bapa keto masi Meme, tiang anak sujati tresna tekening Putu. Yen Bapa ajak Meme suba pada cumpu teken tiang, men kenken teken Putu padidi? Apa ke lakar nyadia nyalanang tresna ngajak dewek tiange?” amonto seken munyine Bli Satya tekening reraman tiange, luluh atine mirengang munyine. Sujati tresnane tekening dewek tiange, lega pesan ati tiange.

“Putu, men kenken Putu jani? Ene Gede suba ngorahang tresna teken Putu, keto masi Gede suba nyadia nyentana dini. Apa Putu tresna teken Gede?” patakon Bapa tiange ento ngae dewek tiange tengkejut, nanging lega yening suba buka kene unduke sinah pajaln tresnane lakar luung kawekas. Tiang anak demen pesan teken Bli Satya, nanging tusing juari ngorahang. Enyak sing nyak ane jani lakar orahang ento makejang.

“Bapa, Meme keto masi Bli Satya, yen mireng munyine uling busan suba pada seken rasayang tiang. Tiang sujatine tresna masi tekening Bli Satya, nanging ada pangidih tiange tekening Bli Satya. Diolas pesan eda kalahina dewek tiange pet prade mani puan ada baya nibenin pajalan tresnan iragane.” Keto pangidihan tiange tekening Bli Satya.

 Sukat petenge ento tresnane ngancan tumbuh di ati. Rerama pada demen tur lega kenehne nolih pajalan tresna iragane. Jele melah majalan mabarengan, sebet lan bagia tusing ada ne ngalahin satata madampingan ngae tresnane sayan raket. Telung tiban suba majalan tresnan iragane ene. Rerama tiange ngajak rerama Bli Satyane suba pada ngarembug, tamat tiang masuk lan Bli Satya masi suba magae, ditu iraga lakar kajangkepang.

Nanging ento makejang tuah kenangan, Bli Satya suba matilar. Ngejoh uling dewek tiange, minab Bli Satya suba engsap teken samayane pidan dugas mulih tiange ngorahang tresna di arep rerama tiange. Pajalan idup, sebet liange tusing dadi kelidin. Samaya tiange di ati tuah lakar ngantosang Bli Satya apang buin mawali ajak dewek tiange. Apang inget teken samayane ipidan. Wireh tresnane ene tusing ada ane nyidaang ngalahang. Samayaning ati tan wenang kaganti.

candra semaya

Candra Samaya

Sunar Sang Hyang Candra rikala wengine punika nyiriang rahina purnama. Galang apadang jagate, pateh taler sakadi galang manahnyane Kadek Juliana. Dinane sane dibi ipun matemu sareng tunangane sane makarya ring dura negara dados palayan hotel. Sampun minab awarsa nenten polih nemuang rasa kangen, rasa rindu sareng tunangan ipun. Galahe sane dibi kaanggen numpahang sakancan rasa sayang ipun tekening Luh Listyani.

Ring bandara Ngurah Rai ipun nyantos tunangane, saking galah 9 semeng ipun sampun irika. Negak ring ruang tunggu, egar manah ipun, kenyam kenyem, saab seeb nolih anak sane liwat irika sira uning wenten Luh Listyani. Tan karasa galahe sampun ngeseng kauh durung masi Luh Listyani rauh, nadak sebet manah ipun Kadek Juliana, semu manisnyane ituni sampun sayan-sayan ilang. “Adi suba kalijani I Luh konden masi neked? Ada kenken ja ene di jalan? Duh..... Ratu Bhatara icenin panjak I Ratu keselamatan lan karahayuan mangda pamargine rauh ring Bali tan wenten kapiambeng.” Wawu asapunika Kadek Juliana mamanah ring kayun nadak wenten anak istri sane makenyem ring arep ipune.

“Bli Kadek.... suba uling tuni Bli ngantosang tiang nggih?” punika pitaken anake istri. Kadek Juliana bengong tan nyaurin pitaken anake istri punika. Makesyab sada girang manah ipune, anake istri punika tan wenten tios wantah Luh Listyani tunangannyane. Makenyem manis Luh Listyani kala punika laut kagelut olih Kadek Juliana pinaka ciri rasa kangen ipune sane sampun kalintang. “Mai Luh... lan iraga mulih. Bli suba sing sabar lakar numpahang kangene di hati ngajak I Luh. Lan Luh.....” magesonan Kadek Juliana ngelesang gelutane laut ipun makakalih menek taksi pacang mulih ka Bangli.

Awuku sane lintang Luh Listyani sampun nelpun Kadek Juliana ngorahang indik dewek ipune pacang mawali ka Bali ring rahinane sane dibi. “Om Swasti astu. Bli Kadek... Bli dija jani?” “Om Swasti astu. Bli jumah niki Luh. Adi tumben Luh nelpun? Kenken kabar I Luhe ditu? Mogi satata rahayu rahajeng nggih sayang.” Wawu sakadi punika raos ipun Kadek Juliana reraman ipun enggal nyagjag ka kamar ipune. “Nyen ento Dek? Luh De nelpun ae? Nang baang Bapa ngomong ajak Luh ajebos.” Kadek Juliana nyerahang HP-ne teken Bapa ipune.

“Om Swasti astu.” “Om Swasti astu Pa.” “Adi tumben nelpun cening Bapa? Kenken kabar ceninge ditu? Buin pidan cening lakar mulih?” punika pitaken Bapan Kadek Julianane. Luh Listyani sampun kadi pianak ipun padidi, pateh sayang ipun tekening pianak miwah teken Luh Listyani. “Tiang becik-becik kemanten driki mangkin Pa. Men Bapa lan Meme punapi? Sami seger nggih Pa? Buin aminggu tiang lakar mulih ka Bali, Pa. Tiang ngidih tulung teken Bapa lan Bli Kadek, jemput tiang ka Bandara nggih. Reraman tiange tan nyidayang nyemput, ring sekolah wenten acara dinane nika. Bapa lan Bli Kadek mrasidayang nggih?” punika raos ipun Luh Listyani tekening Bapan Kadek Julianane. Sada nyambatang dewekne malih awuku jagi mawali ka Bali.

“Bapa ajak Meme ceninge keto masi Kadek konyang seger dini, ning. Yen buin aminggu Bapa tusing nyidayang bareng nyemput cening wireh di desa ade patedunan masi. Ne Kadek apang nyemput cening neked di Bandara, apang Kadek ngalih cuti malu di kampus awaine ento.”  “Nggih Pa. Orahang nika jebos ajak Bli Kadek, tiang tan makelo nelpun sawireh tamune jani liu sajan anak masan liburan. Suksema nggih Pa.” Laut mati telpune. Nanging sami dugase punika pada masemu egar, malih awuku Luh Listyani pacang mawali ka Bali.

Ring rahina purnamane mangkin Kadek Juliana lan Luh Listyani sampun masamaya pacang rauh nangkil ka Pura Kahyangan Jagat Besakih. Wengine punika makakalih nangkil, ngaturang sembah pangubhakti lan ngaturang sukseman ipun majeng ring Ida Sang Hyang Widhi Wasa santukan sangkaning pasuecan Ida, Luh Listyani prasida salamat rahayu mawali ka Bali. Punika taler nyantos mangkin tresna kakalihne sayan raket diastun mapalasan, Luh Listyani ring dura negara lan Kadek Juliana iriki ring Bali.  

Wus ngaturang sembah pangubhakti ring panataran agung Besakih, makakalih ipun mamargi nuju Pura Basukian. Irika dumun kakalihne matemu ritatkala Purnama Kadasa sane sampun 4 warsa ngalintang. Saking patemone punika ngawitin tresnan ipune ngantos nemu Purnama Kadasa mawali mangkin. Ida Bhatara dados saksi patemon kakalihne lan pitresnane sane ngalantur saking patemone punika.

Bulan purnamane sampun sayan endag, sayan galang jagate ring wengine punika. Sunaran Sang Hyang Candra nepen paras ayu Luh Listyanine, wengine punika Luh Listyani mabaju putih, kamen putih lan selendang putih. Punika taler kadek Juliana sami panganggene sarwa putih, nyiriang tulus manah ipun ngaturang pangubhakti lan tulus tresna kakalihne. “Bli Dek, inget tusing dugas iraga matemu dini 4 tiban ane liwat? Iraga enu pada elek-elekan. Pada nguntul tusing ada bani matakon, apa buin lakar makenalan.” Ngrikik kedek Luh Listyani inget teken unduke sane sampun lintang.

“Saja Luh, tusing kerasa galahe majalan saget suba 4 tiban iraga bareng-bareng. Di tongose ene Bli kimud-kimudan nagih makenalan ngajak Luh. Ngedeang keneh apang sida ja makenalan ngajak bajang jegeg idaman Bli.” Romantis pisan raosne Kadek Juliana, ngranayang Luh Listyani sayan kimud tur nguntul. “Iiihhhh.... Bli... nyidayang dogen ngorahang keto. Mai ngaturang pangubhakti malu, nyanan buin ngingetang kenangane pidan.” Makakalih ipun ngaturang sembah pangubhakti ring Pura Basukian. Wusan punika ipun mamargi ka jaba tengah, irika wenten bale pasandekan irika ipun negak. Mawali mineh-minehin unduke sane sampun lintang.

Dumun tan ja kadi mangkin pamargi tresnane, reraman Kadek Julianane nenten satuju yening Kadek matunangan sareng Luh Listyani, sawireh Luh Listyani kari kuliah durung madue pakaryan kenten masi Kadek Juliana durung madue pakaryan ipun wawu tamat saking sekolah tinggi agama iriki ring Bangli. Sampun minab 2 warsa mamargi wawu ipun pada polih pakaryan irika wawu reramannyane satuju. Kadek Juliana sampun dados dosen lan Luh Listyani makarya ring dura negara. “Luh inget sing dugas reraman Bline ngorahin Bli apang pegat matunangan ngajak Luh? Dugas ento raos reraman Bline saja-saja nyakitin hati. Sebet pesan Bli, Luh.” “Tusing dadi keto Bli, rerama sinah dot apang pianakne satata maan ane luung. Tusing ada rerama dot apang pianakne maan sengkala Bli Dek. Yen sing mula sangkaning titah Hyang Widhi sinah suba dugas ento iraga mapalasan. Tiang sayang ngajak Bli, eda pesan Bli ngendah dini. Kontrak gaen tiang tuah buin 9 bulan Bli Dek, tiang tusing buin lakar magae di luar negeri. Adenan suba tiang magae dini jumah di Bali.” Wawu kadi punika raos ipun Luh Listyani masriak galang manah kadek Julianane. Sawireh napi sane kaaptiang sinah prasida kapanggih.

Ipun sampun madue rencana pacang majangkepan, madon jaka sareng Luh Listyani. Reraman ipune sampun ngawanti-wanti mangda Kadek Juliana madue somah, wireh sampun meled pisan pacang ngandong cucu. “Bli sayang masi ngajak Luh. Di beten bulan purnamane ene jani Bli majanji ngajak Luh, Bli tusing lakar ngalahin Luh, tusing lakar ngendah dini, Bli satia ngantosang Luh mawali buin ka Bali. Sang Hyang Candra pinaka saksi semayan Bli teken Luh. Bli tusing lakar lempas teken semayan Bline ene. Wireh tresnan Bli sujati tuah kapining I Luh.” Angine makesir alon nyinahang kasujatian raos ipun Kadek Juliana. “Suksema Bli sampun nyayangin tiang. Wantah nika sane sujati arepang tiang saking Bli. Suksema Hyang Widhi  sampun ngicen tiang anak lanang sane sujati tresna tekening padewekan tiang. Dumogi ja tiang lan Bli Kadek prasida majangkepan lan nglanturang tresnane puniki ngantos riwekas.” Candra Semaya..... Sang Hyang Candra pinaka saksi tresna sih kalih jadma sane nedek suluk maring semara. Semaya inucap, semara kakecap.