Bajang Lading

Bajang Lading

Goba jegeg, kulit putih, langsing lanjar lemuh mageloran. Majalan ngencolang ka tengah kelase, dosene suba ngantosang ditu di kelas. Tusing pesan inget teken jam paplajahan, tungkulanga ngeroman disisi, tusing pedas apa ane itunganga. Neked di aep kelas, tok… tok… tok… “Om Swastyastu Pak. Ampura tiang telat.” Macelep ngencolang ka kelas, tusing nolih anak len disamping.

Mahasisyane ajak makejang suba pada sadia lakar malajah. Mangkin polih mata kuliah Dharma Gita. Tumben dosene selid ka kampus, tusing ada kesibukan ladne ento. “Alit-alit sareng sami rahinane mangkin jagi lanturang materine ka Sekar Agung. Ngiring bukak buku kaca 4.” Keto pak dosen ngraos ngorahin mahasisyane mukak buku paplajahane.

Luh Sundari magosah padidina di mejane, apa kaden ento alihina uyut sing karuan. “Aduuuhhhh….. ija ya ento buku tiange nah? Adi tusing ada di tas? Sinah kecag suba ento.” Keto Luh Sundari ngurimik padidina. “Luh… Luh Sundari, mai dini ajak tiang. Ne bareng buku tiange anggon.” Keto Tu Werdhi ngajakin Luh Sundari apanga bareng-bareng nganggon bukune.  Masaut malih Luh Sundari, “Nggih Tu, ampura tiang ngerepotin niki.” “Nah sing kenapa Luh. Mai dini negak bareng.” Tu Werdhi nglanturang ngorahin Luh Sundari apanga bareng negak ajak ragane.

Luh Sundari jani suba madan kuliah, ia kuliah ngalih jurusan Basa Bali di kampusne. Ia mara semester satu, nanging gayane suba cara anak semester pitu. Liu anak ngorahang Luh Sundari kenyemne manis, anak istri idaman suba ento. Yen konden kenal mula saja keto tolih. Konyang ane tolih stata luwung.  

Jegeg mula saja jegeg Luh Sundari, saja buka adane Sundari wantah anak istri sane ayu. Nanging jegeg goba tusing ja maimbang teken jegeg solahne. Demen pesan ia ngencanin anak len, demen ngegosip jeg ada dogen ane lakar itunganga ajaka timpal-timpalne. Suba malajah di kelas enu masih ngitungang ane len-len. Tusing nawang elek diapin suba liu anake ngomongang, solahne masih tusing masalin. Tetep dogen ngagosip ane tidong-tidong, keto masih timpalne ane sai ajaka patuh buka keto solahne. Beneh suba timpale ane lenan ngorahang Trio Bigos, anak bas demene ngagosip ajaka telu ento.

Jani suba puput paplajahan Dharma Gitane, suba jam mangaso ditu laut Luh Sundari ngajak timpalne ane buin dadua ento ka kantin. Ditu ajaka telu ngomongang Gus Arjun, anak muani ane dadi idaman di kampus. “Santhi, Kupit, nang tolih to Gus Arjun teka. Enken tiang suba jegeg ae? Apang sida ja tiang ngae Gus Arjun jatuh ati ngajak tiang.” Luh Sundari matakon teken timpalne.

Masaut Santhi, “Suba jegeg to Luh, kemu nae paekin Gus Arjun. Apang tusing enggalan anak len ngemalunin. Tiang ajak Kupit ngantosang dini.” Buin Kupit ngorahin Luh Sundari, “Ae Luh, enggalang nae kemu. Apang maan ngerayu batek abedik.” Sambilanga kedek ngilkil Kupit ngomong keto. “Nah… nah tolih jani tiang pasti nyidayang ngerayu Gus Arjun.” Luh Sundari masaut sambilanga magedi nuju tongosne Gus Arjun.

“Gus Arjun, dados tiang sareng siki driki nggih?” keto Luh Sundari nyumunin ngraos. “Oh… Sundari, nggih dados, dados. Mriki negak mumpung tiang masih padidi dini. Sundari suba mesen minum?” Gus Arjun ngorahinSundari negak disampingnyane. Masaut Sundari malih, “Durung Gus, malih jebos tiang mesen. Banggeang sampun dumun. Gus ados preragan?” Sundari ngalih selah matakon apang sida makelo negak bareng Gus Arjun. “Ne timpal-timpale tusing ada nyak ajak ka kantin, konyang enu pada ngitungang tugas di kelas. Men Sundari adi tumben masih padidi tepuk Gus?” Gus Arjun buin nakonin Sundari sawireh tumben tepuke padidiana. “Niki timpal-timpal tiange kari makan. Tiang nyantosang driki dumun jebos.” Keto Sundari nyaruang masaut apang tusing tawanga sujatine ia anak ngantosang Gus Arjun.

Suba makelo ditu padaduanan ngorta kangin kauh, saget Gus Arjun matakon teken Sundari unduk Tu Werdhi. “Sundari dadi tiang matakon nggih?” kenten Gus Arjun matakon teken Sundari. “Dados Gus, nakenang napi?” Sundari mabalik matakon. “Sira nggih gagelane Tu Werdhi?” Makesiab Sundari mara ningeh patakon keto. Tusing madaya yening Gus Arjun demen teken Tu Werdhi. “Tiang ten uning Gus!” sada bangras Sundari masaut laut magedi uling ditu. Gus Arjun mapineh-pineh adi Sundari ngambul takonin keto.

Sukat ento Luh Sundari tusing taen matakon teken Tu Werdhi. Diapin suba malunan Tu Werdhi nakonin nanging tusing taen nyak sautina. Inguh kenehne Tu Werdhi ngudiang timpalne dadi gedeg ajak ia, saingetne ia tusing taen malaksana pelih. Tenguda dadi ati Luh Sundari gedeg teken dewekne.

Tu Werdhi tusing ja jegeg cara Luh Sundari. Ia anak biasa dogen, polos, demen matimpal lan demen matulung teken timpal. Buina Tu Werdhi anak dueg, yening timpalne ada tusing ngerti teken paplajahan ia enyak ngorahin. Ia anak mula polos, liu pesan timpalne ane muani maekin lan ngorahang demen teken Tu Werdhi. Nanging tusing ja ada ne nyidayang ngaenang Tu Werdhi luluh atine, konyang tuah anggona timpal.

Nglantas ngancan gedeg Luh Sundari teken Tu Werdhi apa buin suba tawanga Gus Arjun ane idam-idamanga ento demen teken Tu Werdhi. Ditu laut ia ngajak timpal-timpalne ngrincikang daya apang Tu Werdhi gedegina baan timpalne konyangan. “Santhi,Kupit jalan jani gaenang apang timpale konyang gedeg teken Tu Werdhi. Orahang suba ia demen misunaang timpal. Sinah suba timpale konyang lakar ngejoh teken ia.” Keto Luh Sundari grincikang daya ngajak timpalne.

Makelo-kelo sayan joh timpalne di kelas, tusing ada nyak ane ngomong ngajak Tu Werdhi. Sabilang wai Tu Werdhi stata padidi. Yen ada tugas kelompok sinah suba ia tusing ada ane enyak ngajak makelompok. Sedih ane karasayang baan Tu Werdhi, ngeling maselselan ditu di kelas.tusing nawang unduk apa nanging konyang timpalne ngejohin.

Ditu laut Gus Arjun teka nimpalin Tu Werdhi di kelas. “Tu.. adi Putu dini? Tusing ka kantin?” kenten Gus Arjun matakon. Ngenggalang Tu Werdhi ngusap yeh paninggalane. “Te… ten.. Gus. Malih jebos tiang ka kantin.” Keto Tu Werhi masaut. Toliha Tu Werdhi bengul, Gus Arjun makesiab. “Anak kenapa Tu, adi Putu ngeling? Ada masalah?”

Ngengkebang mua Tu Werdhi mara takonina keto. Elek kenehne yen ulian masalah keto nganti ada anak nawang. Tusing luwung rasane yan ento bakat omongang ngajak anak len. Tu Werdhi anak mula tusing demen yening ada masalah lakar ngomong ajak anak lenan. Takut ngae anak tersinggung lan repot. Keto sasai ane ada dikenehne.

“Tu, adi tusing sautin patakon tiange? Putu anak kenapa? Ngomong ja ajak tiang Tu. Nyen nawang tiang nyidayang nulungin.” Kenten buin Gus Arjun matakon. “Ten Gus, tiang ten kenapi.” Sambilanga bangun lan majalan lakar pesu uling kelas. Nanging mara majalan limane suba gisina teken Gus Arjun. “Tu, tiang nawang Putu ada masalah. Tiang tusing ja nyangetang yen Putu tusing enyak ngorahang teken tiang. Anak suba ada ane ngorahang ngajak tiang, Tu. Eda Putu pesu ngalahin tiang, anak ada ane lakar orahang tiang ngajak Putu jani dini.” Mara ningeh munyi keto Tu Werdhi makleteg, bengong tusing nyidayang ngomong apa.

Negak ditu di kelas padaduanan, tusing ada bani ngamalunin ngomong. Makakalih bengong, sledat sledet nanging tusing makemikan bibihne. Gus Arjun nyuariang dewek lakar nyumunin ngraos, ”Tu, tiang nawang Putu gedegin timpal dini di kelas. Nanging Putu tusing nawang sujatine ulian apa Putu gedegange. Sing beneh keto Tu?”

Tu Werdhi enu elek lakar masaut nanging suba ulian kaselek kudyang buin. “Nggih Gus, tiang bingung teken timpale driki di kelas. Tiang ten uning pelih tiange nanging tiang sayan johne teken timpal-timpale.” Ngrecek ulung yeh peninggalane Tu Werdhi mara masaut amonto. “Eda ngeling Tu. Timpale sujatine tusing ja gedeg ngajak Putu. Ento makejang anak ulian Luh Sundari, ia gedeg teken Putu ulian tiang, Tu. Nanging timpale ane dadianga sasaran apanga enyak nyiepin Putu.” Kenten Gus Arjun ngorahang paundukan ane sujati teken Tu Werdhi.

Bengong Tu Werdhi ningeh raosne Gus Arjun. “Sundari gedeg ngajak tiang ulian Gus Arjun. Adi bisa keto? Tiang anak tusing pelih apa adi ia gedeg?” keto Tu Werdhi mapineh-pineh. Buin ia nyucudang matakon teken Gus Arjun, “Anak kenapi nika Gus, adi Sundari gedeg sareng tiang sangkaning Gus? Pelih tiange napi?” Gus Arjun mangkin nyelasang konyang paundukane, “Kene Tu, dugas ipidan taen tiang matakon teken Sundari. Tiang nakonang sira gagelan Putune, nanging Sundari tusing nyautin patakon tiange. Ia malaib ngembras ngambul. Uling sukat ento ia tusing taen enyak matakon teken tiang lan teken Putu. Ia gedeg ulian munyi tiange ento.”

“Gus, tiang sampun uning yening Sundari sujati tresna kapining Gus. Nika minab mawinan tiang musuhina sareng Sundari. Yening sakadi raos Gus wawu.” Tu Werdhi masaut lan ngengkebang mua. “Tu, sujatine ane tresnain tiang ento tuah Putu. Tiang tusing ja nolih uling goba nanging kasujatian solah ane tolih tiang. Tiang nawang Sundari jegege tusing ada ngalahang, ipidan saja tiang taen demen ajak ia nanging sasukat tawang solahne buka lading ditu tiang mara sadar yening kajegegane tusing maimbang teken solahne. Goab ayu nanging solahe berek.” Gus Arjun numpahang rasa tresnane tekening Tu Werdhi.

“Gus, sujati tiang tresna tekening Gus. Nanging tiang ten enyak yening sangkaning niki tiang pegat matimpal.” Tu Werdhi sujatine anak mula demen teken Gus Arjun nanging tusing enyak yening ulian rasa tresna ia pegat matimpal. “Nah lamun keto munyin Putune luungan suba iraga matimpal. Nanging Putu apang nawang rasa tresna tiange ene tuah teken Putu.”

Mara ngomong amonto saget teka Luh Sundari. Ditu suba ia ngamuk-amuk ulian tawanga Tu Werdhi lan Gus Arjun padaduanan di kelas. Ia tusing nerima yening Gus Arjun dmen teken Tu Werdhi. Ditu ia mamunyi kasar-kasar tekening Tu Werdhi, “Cicing nyai Tu, ulian nyai cang buung dadi tunangane Gus Arjun. Nyai mula anak luh demen ngrebut demenan timpal. Tusing pantes nyai masuk dini yen solah nyai buka kene. Megedi nyai uling dini!” Sundari ngisi limane Tu Werdhi laut kakedeng. Gus Arjun mgegas nyemak limane Tu Werdhi. “Sundari tusing pantes ngomong keto. Tu Werdhi tusing ada pelih teken Sundari. Anak tiang ane mula demen teken ia. Tiang tusing demen teken Sundari ulian solah Sundarine ane buka kene. Tusing ja manut teken adane lan tekening ayu gobane. Saja buka bunga lading, ayu goba nanging bone bengu care bangke. Keto sube solah Sundarine.” kenten Gus Arjun ngraos matbat Sundari.